Andrea Rán Snæfeld Hauksdóttir er 27 ára gömul keppnishörð kona sem hefur komið víða við á sínum atvinnuferli í fótbolta. Þegar hún var fjögurra ára gömul byrjaði hún að æfa fótbolta og þá var ekki aftur snúið. Andrea spilaði alla sína tíð með Kópavogsfélaginu Breiðabliki, enda Kópavogsbúi í húð og hár. Hún hefur elt fótboltann yfir nokkrar heimsálfur og lent í ýmsu á leiðinni. Andrea var svo óheppin að upplifa það að koma með kórónuveirusmit til landsins þótt hún hafi greinst neikvæð við skimun á landamærunum eins og mikið var fjallað um í fjölmiðlum í júní 2020 og hafði það mikil áhrif á hana. Vitað var að PCR-próf greina ekki öll virk smit og allra síst þau sem hafa nýlega tekið sér bólfestu í líkamanum.
