Þórdís Kjartansdóttir lýtalæknir hefur fetað ótroðnar slóðir innan heilbrigðigeirans. Hún hefur meðal annars þróað nýja aðferð í svuntuaðgerðum. Í samstarfi við læknanema hefur hún tekið saman niðurstöður þessarar aðgerðar og birtist greinin innan tíðar. Frakkland á hug hennar en hún bjó í rúman áratug í Frakklandi þar sem hún var í námi í læknisfræði. Hún segist einstaklega þakklát þeirri þjálfun sem hún fékk í Frakklandi og útskýrir nánar í viðtalinu hvað hafi styrkt sig í sínu fagi. Hún er mikil fjölskyldumanneskja og eignaðist sína yngstu dóttur 48 ára. Yngsta dóttir þeirra heldur þeim hjónunum á tánum sem og nýjasta hlutverkið að vera orðin amma. Í einlægu viðtali fer Þórdís yfir fjölskyldusögu sína, hvernig hún hefur tekist á við mótbárur í lífinu en einnig hennar helstu ánægjustundir. Þórdís segir okkur frá starfi sínu sem lýtalæknir, áhugaverðu einkalífi allt frá því að vera frumbyggi í Fossvoginum til flutninga til Frakklands og þegar hún ákvað að opna sína eigin læknastofu hér á landi. Hún segir að lýtalækningar í fegurðarskyni hafa aukist með árunum sökum samfélagsmiðla og í lýtalækningum séu tískutrend eins og í svo mörgu. Hún vonast til að eftirlitið með þessum aðgerðum verði meira og að hún hætti að sjá fólk koma þar sem farið hefur verið yfir strikið og framkvæmt af aðilum sem hafa ekki menntun til þess. Slíkt getur haft alvarlegar afleiðingar í för með sér fyrir einstaklinginn og jafnframt komið óorði á stétt lýtalækna.
Margt spennandi er á döfinni og má búast við því að heyra hana syngja opinberlega í náinni framtíð. Tónlist er hennar ástríða en hún hefur sungið í kórum á Íslandi og með djassböndum í Frakklandi.
