Þórdís Jóna Sigurðardóttir, forstjóri Miðstöðvar menntunar og skólaþjónustu, segir að ekki þurfi að fara í neinar grafgötur með það að staðan í menntamálum á Íslandi sé grafalvarleg. Hún nefnir að fyrst þegar við vorum að byrja með Pisa – mælingar þá vorum við á stað sem við vorum mjög sátt við en það fór snemma að halla undan fæti. Hún vill meina að þetta séu mjög fjölþættar áskoranir. Þá segir hún að staða barna hafi meiri áhrif en áður á námsárangur og þessi hugmynd um Ísland sem stéttlaust samfélag sé í raun útópía. Í viðtalinu fer hún inn á það hvernig við höfum leyft okkur að tala niður þessa mikilvægu stétt, kennara, og um skólasamfélagið í heild sinni. Börnin hlusta á þetta, kennarar hlusta á þetta og þegar fólk upplifir svona vanvirðingu fyrir starfinu sem það sinnir alla daga þá er eiginlega magnað að þetta sama fólk standi vaktina fyrir okkur og sé að sinna þessu.
Þórdís er með BA-gráðu í stjórnmálafræði og MA-gráðu í félagsfræði frá Háskóla Íslands. Að námi loknu á Íslandi lauk hún MBA-prófi frá Vlerick Business School í Brussel. Þórdís hefur mikla reynslu af verkefnum innan menntakerfisins en hún byggði meðal annars upp MBA námið við Háskólann í Reykjavík og starfaði sem framkvæmdastjóri Hjallastefnunnar. Þórdís á þrjú uppkomin börn og fjögur barnabörn. Hún er gift og búa þau hjónin á Hlíðarenda.
Umsjón og texti: Salome Friðgeirsdóttir
Myndir: Alda Valentína Rós
Förðun: Karen Petra Ólafsdóttir
