Á vindasömum en sólríkum degi í byrjun júní tekur samfélagsmiðlastjarnan og leikskólakennarinn Fanney Dóra Veigarsdóttir á móti blaðamanni á heimili systur sinnar á Álftanesinu. Útsýnið út um stofugluggan er draumi líkast og á næsta horni leika lömb sér í haga og gera sér líklega enga grein fyrir því að höfuðborg heimalandsins sé aðeins steinsnar í burtu. Fanney situr í förðunarstólnum því fram undan er forsíðutaka. Yfir henni er þessi rómaði óléttuljómi sem margar konur dreymir um en ekki allar fá að upplifa. Hún ætlar sér að deila sögu dóttur sinnar, Thaliu Guðrúnar, sem var greind með heilaæxli tæpum þremur mánuðum fyrir þriggja ára afmælið sitt. Fanney Dóra segir með sanni að þetta sé ekki sorgarsaga, enda var æxlið fjarlægt í aðgerð sem gekk vel og allar fréttir sem fjölskyldan hefur fengið síðan hafa verið jákvæðar. Henni finnst þó mikilvægt að sagan sé sögð til að aðrir geti lært af þrautagöngunni sem hún og unnusti hennar fundu sig á og einkenndist lengi af baráttu við lokaðar dyr og því að gert væri lítið úr áhyggjum þeirra.
