Femínískar hreyfingar eru sagðar koma í bylgjum, en sannar baráttukonur gera meira en að gára vatn. Þær valda brimróti. Öllum sem þekktu Ólöfu Töru Harðardóttur ber saman um að hún hafi einmitt verið þannig kona. Hún var hugrökk og einörð í baráttu sinni gegn kynbundnu ofbeldi. En vinkonur hennar úr baráttuhópnum Öfgum hafa misst svo miklu meira en baráttusystur. Þær eru að missa kærleiksríka vinkonu sem veitti þeim skilyrðislausan stuðning og tíma á hverjum degi.
Umsjón: Snærós Sindradóttir
Myndir: Olga Björt Þórðardóttir og úr einkasafni
„Jafnvel þó konur lifi af ofbeldið, þá eru lífsgæði þeirra verulega skert og þær glíma við afleiðingar út lífið.“ Þetta sagði Ólöf Tara Harðardóttir baráttukona, í ræðu sinni á kertafleytingu Öfga sem fram fór þann 10. október síðastliðinn. Viðburðurinn var síðasta formlega aðgerð aktívistahópsins Öfga, sem Ólöf Tara var hluti af, og var haldinn til minningar um þær konur sem látið hafa lífið af völdum ofbeldis.
