Líf Alexöndru Daggar Sigurðardóttur hefur sannarlega verið ævintýri líkast. Sautján ára hélt hún fyrst til Suður-Ameríku og varð strax heilluð af menningunni sem mætti henni þar, spænskunni, dansinum og fólkinu. Næstu ár þar á eftir ferðaðist hún víða en alltaf lá leið hennar aftur til þessarar líflegu og sólríku heimsálfu. Eftir örlagaríka tannlæknaheimsókn í Kólumbíu kynntist hún gömlum mexíkóskum manni sem kynnti hana fyrir töfrum jurtalækninga. Sá gamli reyndist mikill spekingur og það fór svo að hún fylgdi honum til Mexíkó til þess að vinna með og læra af honum. Það var þar sem ástríða hennar og áhugi á þessum fornu fræðum kviknaði. Í dag á hún fyrirtækið La Brújería sem býður upp á náttúrulegar og umhverfisvænar húð- og heilsuvörur úr íslenskum og mexíkönskum jurtum.
