Mikil uppbygging hefur átt sér stað á Hlíðarenda og hefur þar risið hratt og örugglega stórt og mikið hverfi, í póstnúmeri 102. Í fallegri, vel skipulagðri íbúð á þessu svæði búa þau Hrafnhildur og Árni. Húsið hefur verið í byggingu síðan árið 2019 og hefur húsaröðin sem þau búa í að geyma 190 íbúðir sem hafa verið að klárast hver af annarri og á miðju svæðinu er stórt og mikið port í miðjunni. Íbúðin þeirra er 100 fermetrar að stærð og fluttu þau inn í maí í fyrra eftir að hafa verið í námi í Dublin. Flutningana heim bar brátt að vegna faraldursins en hér hafa þau búið sér notalegan íverustað þar sem gætir ákveðinna strauma erlendis frá. Stutt er á allar helstu stofnæðar og í opin útivistarsvæði sem heillaði þau mikið.
