Rithöfundurinn og ljóðskáldið Guðrún Eva Mínervudóttir hlaut Íslensku bókmenntaverðlaunin árið 2012 fyrir skáldsögu sína Allt með kossi vekur. Guðrún kom fyrst fram á sjónarsviðið árið 1998 þegar hún vakti mikla athygli fyrir smásagnasafnið Á meðan hann horfir á þig ertu María mey. Árið 1999 gaf hún út Ljúlí ljúlí og árið 2000 Fyrirlestur um hamingjuna sem var tilnefnd til Íslensku bókmenntaverðlaunanna það ár. Síðan þá hafa komið út Albúm, Sagan af sjóreknu píanóunum (báðar 2002), Yosoy: Af líkamslistum og hugarvíli í hryllingsleikhúsinu við Álafoss (sem hlaut Menningarverðlaun DV árið 2005), Skaparinn 2008, Allt með kossi vekur (2011), Englaryk (2014), Skegg Raspútíns (2016), Ástin Texas (2018), Aðferðir til að lifa af (2019), Útsýni (2022) og Í skugga trjánna (2024). Hún hefur gefið út eina ljóðabók (2000) Á brún alls fagnaðar: ljóð handa Hrafni sem er tvöföld bók; hin hliðin geymir ljóðabókina Stiginn til himna: ljóð handa Evu eftir Hrafn Jökulsson.
