Um páskana frumsýndi Sjónvarp Símans nýja íslenska gamanþætti, SKVÍZ, sem fjalla um þrjár ungar konur sem búa saman í miðbæ Reykjavíkur. Í þáttunum birtist íslenskur raunveruleiki eins og hann blasir við fólki á þrítugsaldrinum og það eru örugglega mörg þarna úti sem tengja við kómísk hversdagsævintýri vinkvennanna. Með eitt aðalhlutverkanna fer leik- og tónlistarkonan Silja Rós en hún skrifaði einnig handritið að þáttunum ásamt þeim Tönju Björk, Hlín Ágústsdóttur og Ólöfu Birnu Torfadóttur. SKVÍZ eru framleiddir af Glassriver fyrir Sjónvarp Símans og leikstýrðir af Reyni Lyngdal og voru þeir vafalaust kveikjan að mörgum hlátrasköllunum yfir hátíðirnar.
Hugmyndin að þáttunum kviknaði í L.A. þar sem Silja Rós, Tanja og Hlín bjuggu. „Við vorum allar nýútskrifaðar leikkonur að ákveða okkar næstu skref og fundum að okkur langaði að skrifa áhugaverðar sögur um upplifun kvenna. Við deildum eigin upplifunum með hver annarri og enduðum yfirleitt í hláturskasti yfir vandræðalegum sögum; sem betur fer skildu ekki margir íslensku í Hollywood,“ segir hún og hlær.
