Bíllinn er fínn til að koma okkur á milli staða en það má nota hann í ýmislegt fleira en skutlast með rusl í Sorpu eða keyra með börnin til tannlæknis. Það má líka nota hann sem afdrep fyrir kelerí og kynlíf. Sé friðurinn lítill sem enginn á heimilinu eða hætta á að unglingurinn æði inn á ykkur í miðjum klíðum getur til dæmis verið virkilega notalegt að bregða sér í bíltúr með makanum til að gamna sér einhvers staðar í einrúmi. Meira að segja þótt þú farir ein/n, ef þú skilur hvað ég meina. Það þarf ekki einu sinni að fara langt, bíllinn gæti þess vegna staðið inni í bílskúr. Þetta snýst allt um að finna rétta staðinn, stilla sig inn á aðstæður og muna að hafa gaman. Ég tók saman nokkur atriði sem gott er að hafa í huga áður en farið er að gamna sér í bílnum.
