Snædís Xyza Mae Jónsdóttir er margverðlaunaður matreiðslumeistari og hefur verið einn af fremstu kokkum landsins um árabil. Hún starfar í dag sem yfirmatreiðslumaður á Fröken Reykjavík Kitchen & Bar og þjálfar samhliða því íslenska kokkalandsliðið. Hún er fædd á Filippseyjum og bjó þar til fjögurra ára aldurs en þá var hún rifin upp með rótum og flutt til Íslands. Þó hún hafi verið heilluð af landinu við fyrstu sýn, og þá sérstaklega snjónum, litaðist æska hennar af hræðilegu ofbeldi sem hún varð fyrir af hálfu móður sinnar og byrjaði strax og til Íslands var komið. Á unglingsárunum flakkaði Snædís á milli fósturheimila þar sem aðstæður voru oft óviðunandi. Síðustu ár hefur hún lagt sig alla fram við að vinna úr áföllum uppvaxtaráranna og er óhrædd við að taka það pláss sem hún á skilið.
