Berglind Pétursdóttir var feimin sem barn og hafði sig lítið í frammi í skólanum, þó hún léki á als oddi innan veggja heimilisins. Hún byrjaði ung í ballett og hélt áfram í dansnámi fram á fullorðinsár en tvítug útskrifaðist hún með háskólagráðu í dansi frá Listaháskóla Íslands. Þó hún hafi stefnt ótrauð á frama í dansheiminum leiddi lífið hana á aðrar slóðir. Í dag hefur Berglind slegið í gegn bæði í auglýsingageiranum og á sjónvarpsskjánum og er á blússandi siglingu. Hún fer í gegnum lífið með jákvæðnina og gleðina að vopni og er sannfærð um að það hafi opnað fyrir henni ótal dyr sem hana dreymdi ekki einu sinni um að ganga í gegnum.
