Hlaðvarp vikunnar að þessu sinni er Morðcastið en þar fjalla systurnar Unnur og Bylgja Borgþórsdætur um íslensk og erlend sakamál á léttum nótum. Hlaðvarpið er í miklu uppáhaldi hjá þeirri sem hér skrifar, jafnvel þó sálartetrið hafi eflaust beðið varanlega hnekki af hám-hlustuninni. Systurnar stjórna því með stakri prýði og ná einhvern veginn að vega upp á móti hryllingnum með líflegri og viðkunnanlegri framkomu sinni og húmor. Þó þær elski að sökkva sér ofan í hryllileg og oft og tíðum ógeðfelld viðfangsefni hafa þær systur ýmis önnur og léttari áhugamál. Þær elska að ferðast og þá ekki síst saman, lesa bækur, horfa á sjónvarp, hanga með fjölskyldunum sínum, prjóna og borða góðan mat.
Við fengum að spyrja þessar frábæru systur út í hlaðvarpsheiminn og sakamálaáhugann.
