SPJARA er fataleiga og vettvangur þar sem tíska og sjálfbærni haldast í hendur. Kristín Edda Óskarsdóttir og Sigríður Guðjónsdóttir stofnuðu SPJARA þegar þær hittust í Spjaraþoni Umhverfisstofnunar fyrir nokkrum árum. Spjarasafnið hefur að geyma fjölbreytt úrval af fallegum og eftirtektarverðum flíkum en Sigga og Kristín leggja áherslu á gæði og sígilda hönnun framar tískubylgjum. Þá velja þær aðallega flíkur frá skandinavískum framleiðendum. SPJARA er lausn fyrir þá sem vilja aukið fataval á umhverfisvænan máta.
,,Að leigja er skemmtileg leið til að draga úr ofneyslu. Með árunum hefur verið gífurleg aukning í magni af fötum sem fólk kaupir og um leið minni nýting á hverri flík. Sérstaklega sjáum við þetta með flíkur sambærilegar þeim sem við leigjum út, sparifötin sem oft hanga nánast óhreyfð í fataskápnum,” segir Sigga og bætir við að margir glími við þá löngun að vilja klæðast einhverju nýju fyrir sérstök tilefni en SPJARA býður einnig upp á þá góðu tilfinningu sem fylgir því að klæðast fallegri og vandaðri flík.
