Skemmtilega og fjölhæfa Ebba Guðný Guðmundsdóttir er þekkt landsmönnum úr sjónvarpinu en hún hefur kennt okkur að elda og fara vel með matinn. Hún er kennari að mennt og hefur haldið fyrirlestra um heilsu og næringu barna og fyrir alla fjölskylduna. Ebba hefur líka verið dugleg að halda fræðslufyrirlestra um matarsóun í fyrirtækjum landsins. Ebba segist elska Agöthu Christie bækurnar og telur sig hafa náð að lesa þær allar og skemmt sér konunglega. „Mér finnst ég eiginlega bara læra helling líka á því að lesa þær, um mannlegt eðli og um að treysta ekki í blindni því sem sagt er.“
