Endurnýting og umhverfisvernd spilar stórt hlutverk hjá hönnunarfyrirtækinu FÓLK Reykjavík. Ragna Sara Jónsdóttir, stofnandi og listrænn stjórnandi FÓLK Reykjavík, segir vörur fyrirtækisins fyrst og fremst eiga að tala til fólks á fagurfræðilegan hátt en að sagan á bak við hönnunina auki virði hennar svo til muna. FÓLK notar einungis hrein og náttúruleg eða endurunnin hráefni og segir Ragna eftirspurnina eftir hönnun sem gerð er á umhverfisvænan hátt svo sannarlega vera að aukast. Hún vill vekja fólk til umhugsunar um ábyrga neyslu og framleiðslu og vill sjá meira gagnsæi; að hennar mati á nefnilega ekki að vera erfitt eða
leiðinlegt að kaupa umhverfisvæna hönnunarvöru.
