Kristín Ómarsdóttir er ung kona sem hefur stundað skautaíþróttir í yfir 20 ár. Nýlega stofnaði hún sitt eigið skautafélag ásamt tveimur öðrum konum, en hún segir að of mikil og röng áhersla sé á keppni innan íþrótta og að ofbeldi þrífist þar. Kristín er íþróttafræðingur með meistaragráðu í kennslufræðum en fékk þau skilaboð í grunnskóla að hún gæti ekki lært en hún átti við námsörðugleika að stríða. Hún hafði ýmis plön í lífinu þegar hún varð ófrísk og rakst harkalega á vegg sem tók hana mörg ár að vinna sig í gegnum. Kristín vill efla lýðheilsu og segir að félagslegi og andlegi þátturinn megi alls ekki gleymast í íþróttum og þjálfun.
