Veturinn er sá tími þegar gróðurinn liggur í dvala. Á veturna eyðir fólk líka minnstum tíma í garðinum, enda veðrið á þessum árstíma sjaldan þannig að það sé hvetjandi til útiveru. Garðurinn getur þó verið svo miklu meira en bara staður til að sitja úti á sólríkum sumardögum. Hann er líka staður til að njóta í núinu, til að finna fyrir kyrrð og ró og jarðtengingu. Þar sem veturinn nær yfir rúmlega hálft árið er full ástæða til að skipuleggja garðinn þannig að hægt sé að njóta hans árið um kring, jafnvel um hávetur, þó ekki sé nema bara þeirra hluta garðsins sem sjást frá húsinu.
