Á Borgarfirði Eystra búa kannski fáir en samrýmt samfélagið hefur sannarlega alið af sér fjölda skapandi hugsuða sem hafa sett mark sitt á íslenskt menningarlíf. Einn þeirra er tónlistarkonan Aldís Fjóla Borgfjörð Ásgeirsdóttir sem er að eigin sögn skemmtileg blanda af sveitastúlku og heimshornaflakkara. Hún starfar samhliða tónlistarferlinum sem Music Coach og CVT raddþjálfi ásamt því að vinna sem gusari hjá Rjúkandi Fargufu. Hún býr í dag í miðbæ Reykjavíkur og rekur Gleymmérei Music sem er skóli sem leggur áherslu á söngtækni, lagasmíðar og þróun tónlistarfólks með ýmiskonar námskeiðum.
