Tónlistarheimurinn hefur tekið stakkaskiptum síðasta áratuginn með tilkomu streymisveita á borð við Spotify, YouTube og Apple Music. Landamæri hafa verið máð og tónlistin er orðin mun aðgengilegri en áður. Á sama tíma hefur útgáfum fjölgað til muna og tónlistarfólk upplifir sig oft sem agnarsmáa fiska sem svamla stefnulaust í gríðarstórri tjörn. Þá getur reynst vel að fá aðstoð fagfólks sem er menntað í hinni praktísku hlið tónlistarbransans en ein þeirra er Anna Jóna Dungal sem er með gráðu í Music Business frá BIMM Institute í Berlín. Anna Jóna tók nýverið við stöðu verkefnastjóra viðburða og markaðsmála hjá Salnum í Kópavogi og er einnig umboðsmaður systkinasveitarinnar góðkunnu Celebs. Við fengum að spyrja hana aðeins út í störf sín.
